(Para kay Jeffrey Laude ng Olongapo)

ni RAYMUND B. VILLANUEVA
Bulatlat.com

Apatnapu’t limang minutong tumagal ang kamatayan
Mula ‘Ambyanz’ hanggang ‘Celzon’—mga binantong pangalan

Tulad ng pagpapakilala sa marikit na si Jennifer
Lalaki, babae, bakla, binabae, transgender

Halikayo’t ating pagpiyestahan
Ang malugay niyang buhok, malulusog na dibdib
Ang mapagmungkahing apelyidong ‘Sueselbeck’
At mapulang labi’t titig na mapang-akit.
Isaysay natin ang pagpasok sa hotel
Ang pag-akyat sa hagdanan at pagpapaalis sa kainalam
Ang swabeng pagtalilis ng pinaghihinalaan
Apatnapu’t limang minuto matapos silang iwanan.
Huwag na huwag nating kalimutan
Ang manipis na kumot sa kanyang katawan
Ang tapyas niyang tenga, pagkasubsob sa inidoro
At marka ng sakal sa kanyang mabining leeg.
Ipagbunyi natin ang maagap na pagpigil
Sa puti at matikas na kaibiga’t panauhin
Ang agarang imbestigasyon at pakikipagtulungan
At di pagtakas ng barko-de-gyerang pinaglulan.

‘Yan! Ganyan ang tunay na pakikipagkaibigan
Nag-iingay tayong wala namang pinapatungkulan
Tanggapin sila’t patuloy na papurihan
Tanda ng tangi’t dalisay na kapatiran.

–12:48 n.h.
14 Oktubre 2014
Central, Lungsod Quezon