NI RUSTUM CASIA*
Inilathala ng Bulatlat
Vol. VII, No. 19, June 17-23, 2007

At gusto mong paniwalaan ko na di mo talaga alam kung paano nawala ang mga CoC?

Kung sinabi mong –

habang papunta kayo sa Maynila
para i-deliver sa national canvassers
ang resulta ng Maguindanao,
biglang may dumating na apat na dragon:
y’ung dalawa, tatlo ang ulo
y’ung isa, ‘sinlaki ng Mall of Asia
y’ung isa, malaki lang nang kaunti
sa bus na biyaheng Ayala-LRT-Leveriza

at inatake kayo
at maraming poll watcher ang napuksa
(pansamantalang di isinapubliko ang kanilang mga pangalan
habang ipinapaalam sa kanilang mga kamag-anak ang kanilang sinapit)

at mabuti na lang at may kasama kayong
nagtapos ng Biology sa Harvard
at may biyaya na makipag-usap sa mga hayop

at nakipag-negotiate na hayaan kayong makabalik ng Maguindanao,
kapalit ng mga CoC,

at pumayag ang mga dragon

– baka naniwala pa ako.

Inilathala ng(Bulatlat.com)

*Si Rustum Casia ang tagapagtatag ng grupong pampanulaang Kilometer 64.

 Save as PDF