Minsang Ako'y Humibik

NI REY TAMAYO, JR.

Inilathala ng Bulatlat

May maipapakinabang ba ang isang tulad ko

na sa kabila ng nagdudumilat na katotohan

ay pilit namang idinidiin sa salang hindi ko kailanman ginawa

at sa hinagap ay hindi man lamang sumagi

sa akin ang mang-agrabyado ng kapwa tao.

Ang kapalit ba ng pagtulong sa kapwa

ay wari bang isang sumpa ng kamatayan

na malagim pa sa pagpapatiwakal?

Anupa't sakali, ako'y hahatulan ng pagkabilanggo

odili naman kaya'y ng kamatayan.

Ang inyo bang mga labi ay ngingiti

at sa kalauna'y hahalakhak sa tagumpay na inyong nagawa?

Kahimanawari'y hindi mapigtal

ang umaandap-andap na liwanag

na nagsusumikap na pumawi

sa nakagigimbal na namamasdang dilim.

(Lumabas ang di-mapigilang mga luha sa aking mga mata

at tuluyang dumaloy sa pisnging nangungulila,

habang marahang itinataas ang aking

mukha at iginala ang paningin.)

Tangi nga bang mga luha na lang

ang magsasabi ng katotohanan sa gitna na kawalang-malay?

Sa dahilang ang malakas kong pagsigaw

ng katarungan ay unti-unti nang pumapanglaw.

Umid na rin ang paos kong tinig sa paghiyaw

sa animo'y ilang na dako ngunit sa katunayan

ay di mabilang na taong kumukubli sa kasinungalingan.

Mga taong ipinipihit ang kanilang pakinig

na waring ang kasiyahan ay makinig ng mga katha,

mga paningin na ibig sumaksi sa kabulaan.

Ganito ang gawi ng maraming tao sa kasalukuyan.

(Panandaliang idinampi ko ang dulo ng kapirasong panyo

sa nangangalumata kong mga mata)

Sana nga'y makatanggap ako ng tunay na hustisya.

Inilathala ng Bulatlat

Permission is granted to reprint or redistribute this article, provided its author/s and Bulatlat are properly credited and notified.